EU. Proxecto Fotográfico Persoal

Por que hai que seguir á maioría? Por que debemos ter gustos practicamente idénticos e facer o mesmo ca o resto da xente? Somos un rabaño de ovellas, todas xuntas desprazándonos cara ao mesmo sitio. E, se unha vai ao contrario, xa é a ovella negra, a que non segue as normas, a que é diferente, rara.

 

Existe certo medo a ser unha mesma, a non encaixar, a non pertencer a ningún grupo.

 

Teño 23 anos e sempre fun, e sigo sendo, bastante distinta ás demais persoas.

Por que ás veces non me gusta a xente e mesmo me agonía? Por que prefiro estar soa a acompañada? Por que cada vez que me cruzo con alguén sinto como a súa ollada queda cravada en min?

 

Seica son demasiadas preguntas.

 

Esta cuestión algo difusa, desas que se te meten na cabeza e logo xa non saen, é o punto de inicio de EU.

Este proxecto nace como un xeito de autocoñecemento. Saber de min mesma a través de imaxes que expresan o que con palabras nunca digo. Pode que por non ser capaz, ou seica polo medo que habita no meu corpo.

 

Falan de como me sinto e o que sinto ao saír da miña cotiandade e acudir a eventos, lugares ou atoparme en contextos totalmente descoñecidos para min ou que, a priori e por certas razóns que parten do meu eu interior, non pertencen aos meus intereses, aínda que si aos da maioría das persoas.

 

Unha festa de verán, unha velada de boxeo e o Nadal nas rúas de Vigo. Espazos que adoitan ser agradables e que para min representan todo o contrario.

 

Multitudes de xente, aglomeracións, o balbordo que se crea, o conxunto de ruídos que non cesa… Todos eles chamaron a miña atención. Pero non de forma positiva, senón polo medo que me causaron.

 

Medo a sentirme observada e xulgada negativamente por ser diferente, por ser calada, tímida ou por non atoparme cómoda na presenza de moitas persoas.

Esta historia non ten un inicio nin un fin.

Non comeza por ningunha parte e tampouco remata.

Non hai unha orde concreta.

Do mesmo xeito, as fotografías atópanse ceibes dentro da súa caixa ao igual que ceibes se atopan os meus sentimentos e pensamentos dentro do meu corpo.

Uso de las cookies

Esta web utiliza cookies para que tengas la mejor experiencia de usuario. Si continúas navegando estás dando tu consentimiento para la aceptación de las mencionadas cookies y la aceptación de nuestra política de cookies, haz click en el enlace para mayor información. ACEPTAR

Aviso de cookies